I pānui au i te kōrero i hea rā e mea ana, e whakaatu ana tō tātou hononga ki te moana i te āhua o tā tātou titiro ki a tātou anō. Kei te mārama tēnei ki a au, nā te mea i a au e tupu ake ana i kite au i te moana hei wai noa iho. Kāore ōna hiranga. Ko te aroha, i pērā anō te āhua o taku titiro ki a au anō.
He uri ahau nō Ngāpuhi, ā, i tupu ake ahau i Te Tai Tokerau, i waho tonu atu i tōku whare te one o Waipū. E hia nei hāora i pau i runga i te waka i waho i te moana i taku tamarikitanga, i ngā haerenga mō te rā ki Te Oneroa-a-Tōhē, ki te Hokianga, ki Te Rerenga Wairua, ki ngā wāhi mohoao katoa i tau mai ai ōku tūpuna i tō rātou taenga tuatahitanga mai ki Aotearoa.
Ahakoa i karapotia ahau e te moana i a au e tupu ake ana, he wāhi noa iho te moana i haere ai au nā te āki mai a Māmā. I mea a Māmā he torutoru ngā wā i tata toremi ahau, nā konā pea i pērā ai ōku whakaaro. Kāore au i pai ki te makariri, ki te haukerekeretanga ōku e ngā ngaru me te kore i haumaru o te noho.
I tīmata te huri o taku hononga ki te moana i te pakekenga ake o taku hononga ki a au anō. I tērā tau, i whai ahau i tētahi akoranga rumaki ki te reo Māori, ā, ko te tau uaua katoa tērā o tōku ao. I tīmata taku wewete i ētahi wāhanga ōku kāore nei au i mōhio mā te ako i tētahi reo i ngaro i te patunga o ōku tūpuna. I tīmata te pupū ake o ngā kare ā-roto tē taea e au te purupuru, ā, ka pā mai anō te wawaro e tō ana i a au kia haere ki te moana.
I taua wā rā, kāore i mārama ki a au te take. E whā tekau meneti te matara o Piha i taku kāinga, ā, i te mātotorutanga hoki tēnei o te hōtoke. Kāore au i mārama. I whakarongo ahau ki ngā āki mai, i piki au i tōku waka, ā, i te tātā mai hoki te ua ki runga i te matapihi o mua o te waka i a au e haere atu ana ki te wāhi ka noho mai hei āhuru mōwai mōku.
Ko te mea kē hoki, ahakoa i tupu ake ahau i te taha o te moana, huri ki hea, arā te moana, ka noho mai ko te one he pango te kirikiri e huna ana i te rohe o Waitākere taku tino wāhi mohoao i Aotearoa. Ka haere koe i ngā huarahi e pupuhi nei ngā hau, kātahi koe ka tae ki tua o te piko, ananā, ko te tirohanga atu tērā i te taumata o te pari ki te moana. Ka tangi te mapu i te tirohanga atu, ka rere te murakehu “wiiiii”, ahakoa kua kitea kētia e hia kē nei ngā wā. Ka whakatū koe i tō waka, arā e tū mai rā te pōhatu e rite nei ki te raiona te āhua, kātahi koe ka mahara he mohoao, he mōrearea a Piha, ā, he tokomaha kua hinga i konei. E papaki mai ana ngā ngaru, ā, ka mau koe i te kauere ki te kore koe e tūpato.
I tōku haerenga tuatahitanga atu ki Piha i tērā tau i te pakaru mai te ua. Ko Tangaroa te atua o te moana, ā, nōna hoki te mauri o te moana. I karakia atu ahau ki a ia, kātahi au ka ruku ki te wai. I taku pueatanga ake, i māmā ahau, ā, i rongo anō ahau i te mau o te hono. Ko Tangaroa tērā e whakahaumanu ana i taku wairua. Ko tāku i ako ai, kia kaukau koe i te moana e whakaawhitia ana koe ki tōna aroha. I kapo ake ia i ōku tūmanako me ōku wawata me te horoi atu anō i ōku roimata.
I te pānga mai o ngā uaua o te ako i te reo Māori, i whati atu ahau ki Piha ki te tuku atu i te katoa ki a Tangaroa. Nāwai rā, ka noho tēnei hei tikanga māku. Ahakoa te āhua o te kare ā-roto, o te āhuatanga rānei kua pā mai, ko te āhua nei i mārama mai a Tangaroa ki a au. Ka noho, ka noho, ā, ka tīmata te huri o tāku nei titiro ki ahau anō.
I tēnei tau, kāore ahau i whakaora noa mai i tōku reo, i whakaora mai hoki ahau i tōku hononga ki ahau anō mā te moana. He moana hīngarungaru, he moana hūkokikoki, he moana ātaahua, he moana takarepa hoki a Piha. He taonga hoki, ā, he pērā anō te āhua o tāku nei titiro ki ahau anō. Kāore he ritenga i te ao katoa.
Nā Shilo Kino nō Ngā Puhi me Tainui. He kaituhi, he kaikawe kōrero, ā, nāna te pakimaero The Pōrangi Boy i tuhi
